लमजुङको क्व्होलासोथार गाउँपालिका ६ पसगाउँमा फागुन १८ र १९ गते १५ औं पसगाउँ महोत्सव भव्यताका साथ सम्पन्न भएको छ । पसगाउँलाई देश विदेशमा थप चिनाउन, स्थानीय भेषभूषा, कला संस्कृति, गीत संगीतको संरक्षण र संवद्र्धन गर्न, गरिवी न्यूनीकरण गर्न, स्थानीय उत्पादनलाई प्रवद्र्धन गर्न महोत्सव आयोजना गरिएको आयोजकले जनाएको छ ।
समुद्री सतहबाट १ हजार ६ सय ५० मिटरको उचाइमा रहेको सुन्दर गाउँ पसगाउँमा पहिलोपटक २०६० साल बैशाख १६ र १७ गते पहिलो पसगाउँ महोत्सवको आयोजना गरिएको थियो ।
बीच सयम कुनै वर्ष रोकिएको महोत्सवलाई पछिल्लो समय निरन्तरता दिइएकोमा यसवर्ष भव्यताका साथ सम्पन्न भएको आयोजक पसगाउँ सामुहिक होमस्टेका अध्यक्ष एवम् क्व्होलासोथार गाउँपालिका अध्यक्ष सूर्यप्रसाद गुरुङले बताए ।
महोत्सवको उदघाटन गर्दै गण्डकी प्रदेशका उद्योग तथा पर्यटनमन्त्री मित्रलाल बस्यालले गाउँमा रैथाने उत्पादन र यातायातको सुधार गर्न सकेमा आन्तरिक तथा बाह्य पर्यटक बढ्ने बताए । उनले रैथाने उत्पादनलाई ब्राण्डिङ र लेबलिङ गरेर स्वरोजगारसंगै आयआर्जन बढाउन सकिने बताए ।
मर्स्याङ्दी गाउँपालिकाका अध्यक्ष अर्जुन गुरुङले पर्यटन र कृषिको माध्ययमबाट विकास र सम्वृद्धि सम्भव रहेको बताए । क्व्होलासोथार गाउँपालिकाका अध्यक्ष सूर्यप्रसाद गुरुङले गाउँको कलासंस्कृतिलाई विश्वभर फैलाउन र पर्यटकलाई गाउँमा भित्राउन गाउँलेले महोत्सव आयोजना गर्दै आएको बताए ।
उदघाटन कार्यक्रममा क्व्होलासोथार गाउँपालिका उपाध्यक्ष गमीमाया गुरुङ, प्रमुख प्रशासकीय अधिकृत माधवप्रसाद वाग्ले, नेपाल पत्रकार महासंघ लमजुङ शाखा अध्यक्ष सन्देश पौडेल, अन्नपूर्ण संरक्षण क्षेत्र आयोजना (एक्याप) का पर्यटन सहायक ब्रिजबहादुर गुरुङ, वडा नं. ७ का वडाअध्यक्ष लक्षुमन गुरुङ लगायतले शुभकामना मन्तव्य राखेका थिए । क्व्होलासोथार गाउँपालिका ६ का वडाअध्यक्ष मनलाल गुरुङका अनुसार गाउँका २१ घरमा होमस्टे सञ्चालन गरिएका छन् ।
महोत्सवमा लोपुन्मुख घाँटु, कृष्णचरित्र, सारङ्गी नाच, आमा समूह, युवा क्लवको पौराणिक नृत्य प्रस्तुत गरिएको थियो । महोत्सवमा अलैंची र चिया बगानको दृश्यावलोकन, स्थानीय गुरुङ खाना महोत्सव, प्राकृतिक दृश्यावलोकन, स्थानीय तथा राष्ट्रिय कलाकारको प्रस्तुति लगायतका कार्यक्रम राखिएको महोत्सव प्रचार प्रसार समितिका संयोजक गोपाल गुरुङले जानकारी दिए ।
लमजुङ सदरमुकाम बेंसीसहरबाट मालिङ, साल्मेभञ्ज्याङ, घाम्राङ हुँदै पसगाउँ पुग्न सकिन्छ । साल्मेभञ्ज्याङबाट चरागाउँ, बगैंचा हुँदै पनि पसगाउँ पुग्न सकिन्छ । बेंसीसहरबाट घलेगाउँ, भुजुङ हुँँदै पनि पसगाउँ पुग्न सकिन्छ ।
यस्तै, बेंसीसहरबाट भोर्लेटार रामबजार अथवा पोखराबाट रामबजार भएर करापु, छापा, गिलुङ हुँदै साल्मेभञ्ज्याङ निस्किएर चरागाउँ वा घाम्राङको बाटो पसगाउँ पुगिन्छ । पोखराबाट भैंसे, थुम्सीकोट, मुंग्रीवेसी, बालुवावेसी, वगैंचा हुँदै पसगाउँ पुगिन्छ । काठमाडौंबाट तनहुँको दमौली हँदै लमजुङको दुइपिप्ले, भोर्लेटार, रामबजार हुँदै गिलुङको बाटो भएर पसगाउँ पुगिन्छ ।
प्रकाशित मिति: शुक्रबार, फागुन २३, २०८१ १६:१५
