बेंसीशहर नगरपालिका ७, सहजी खेलमैदानमा आयोजित प्रथम लमजुङ खेलकुद तथा साँस्कृतिक महोत्सव २०८१ भव्यताका साथ सम्पन्न भएको छ ।
फागुन ६ गतेदेखि १८ गतेसम्म आयोजना गरिएको महोत्सव १९ गते समापन गरिएको थियो । महोत्सवमा विभिन्न खेलकुद प्रतियोगिता आयोजना गरिनुका साथै कला संस्कृति प्रस्तुत गरिएको थियो । महोत्सव भव्य रुपमा सम्पन्न भएको आयोजक प्रथम लमजुङ खेलकुद तथा साँस्कृतिक महोत्सव २०८१ आयोजक समितिका अध्यक्ष योगबहादुर गुरुङ (कालु) ले बताए ।
उनका अनुसार महोत्सव अवधिभर डेढ करोड रुपैयाँ बराबरको कारोबार भएको अनुमान गरिएको छ । महोत्सव अवधिभर २२ हजार टिकट विक्री भएको महोत्सव व्यवस्थापक राज घलेले बताए ।
महोत्सवको पहिलो दिन फागुन ६ गते, दोस्रो र तेस्रो दिन दिउँसोसम्म, १३ गते दिउँसोसम्म र समापनको दिन खुल्ला गरिएको थियो । १ सय बढी स्टलमा ४ देखि ८ जनासम्म रहेका थिए । महोत्सवस्थल बाहिर घरका छत, पाखा तथा नजिकैबाट महोत्सवमा टिकट काटेर हेर्ने भन्दा बढी दर्शकले महोत्सवको अवलोकन गरेका थिए । महोत्सवस्थलमा आयोजक समिति, सल्लाहकार समिति, जनप्रतिनिधि, सुरक्षा निकाय, सञ्चारकर्मी, स्वयम्सेवक, खेलाडीलगायतलाई निःशुल्क पास वितरण गरिएको थियो ।
महोत्सव अवधिभर २ लाख हाराहारीले महोत्सवको अवलोकन गरेको आयोजकले दावी गरेको छ । महोत्सव हेर्न लमजुङका मात्रै नभएर कास्की, मनाङ, गोरखा, तनहुँ साथै पोखरा, चितवनलगायत ठाउँबाट दर्शक आएका थिए ।
महोत्सवमा आयोजना गरिएको पुरुष भलिबल प्रतियोगितामा राइनास नगरपालिका पहिलो र मध्यनेपाल नगरपालिका दोस्रो भए । विजेताले नगद ५० हजार रुपैयाँ, कप, मेडल र प्रमाणपत्र पाए । उपविजेताले २५ हजार रुपैयाँ, कप, मेडल र प्रमाणपत्र पाए ।
महिलातर्फ मध्यनेपाल नगरपालिका पहिलो र बेसींशहर नगरपालिका दोस्रो भए । पहिलोले ३० हजार रुपैयाँ, कप, मेडल र प्रमाणपत्र साथै द्धितीयले २० हजार रुपैयाँ, कप, मेडल र प्रमाणपत्र पाए । पुरस्कार महोत्सव समापनको अवसरमा वितरण गरिएको आयोजक प्रथम लमजुङ खेलकुद तथा साँस्कृतिक महोत्सव २०८१ आयोजक समितिका सचिवालय प्रमुख आशबहादुर गुरुङले जानकारी दिए ।
खुला व्याडमिन्टनतर्फ रोहित गुरुङ र सुभाष श्रेष्ठको जोडी पहिलो भए । विनोद तामाङ र प्रल्हाद बोहोराको टोली दोस्रो भए । सेमीफाइनमा सुनिल थापा र सुरेशकुमार प्रधान तथा दीपेन्द्र गरुङ र निपेन्द्र श्रेष्ठ पुगे । विजयी प्रथमलाई १५ हजार, दोस्रोलाई १० हजार रुपैयाँ साथै सान्त्वयना पुरस्कार जोडीलाई १ हजार ५ सय रुपैयाँका दरले प्रदान गरिएको आयोजकले जनाएको छ ।
छेलोतर्फ सुन्दरबजार नगरपालिका ३ का निशान परियार पहिलो भए । दूधपोखरी गाउँपालिका २ का वीरबहादुर तामाङ दोस्रो भए । उनीहरुले क्रमशः १५ हजार र १० हजार नगद तथा प्रमाणपत्र पाए ।
स्कुनरमा अवसर मियाँ पहिलो र रवि बस्नेत दोस्रो भए । हाइएष्ट ब्रेकर रवि बस्नेत नै भए । उनीहरूलाई क्रमशः ३० हजार, २० हजार र १० हजार रुपैयाँ नगद प्रदान गरिएको थियो ।
अन्तरपालिका विद्यालयस्तरीय कराँते प्रतियोगितामा बेंसीशहर नगरपालिकाले ११ स्वर्ण, ५ रजत र ३ कास्य पदकसहित पहिलो भए । १ स्वर्ण, ५ रजत र ५ कास्य पदक प्राप्त गरी सुन्दरबजार नगरपालिका दोस्रो भए । १ रजत र ११ कास्य पदकसाथमा राइनास नगरपालिका तेस्रो भए । विजयी टीम पहिलोलाई ३०, दोस्रोलाई २० र तेस्रोलाई १० हजार रुपैयाँ, मेडल र प्रमाणपत्र प्रदान गरिएको आयोजकले जनाएको छ ।
महोत्सवको उदघाटन सञ्चार तथा सूचना प्रविधिमन्त्री एवम् सरकारका प्रवक्ता पृथ्वीसुब्बा गुरुङले गरेका थिए । समापन बेंसीशहर नगरपालिका प्रमुख गुमानसिंह अर्यालले गरेका थिए । समापन कार्यक्रममा बेंसीशहर नगरपालिका ७ का वडाअध्यक्ष ऋषिराम बस्नेत, वडा नं. ८ का वडाअध्यक्ष पवित्रा थापा राना, नेपाल आदिवासी जनजाति महासंघका जिल्ला अध्यक्ष रामकुमार श्रेष्ठ, लमजुङ उद्योग बाणिज्य संघका कोषाध्यक्ष भरतबहादुर विष्टलगायतको उपस्थिति थियो । कार्यक्रमको सञ्चालन अनुज अधिकारीले गरेका थिए ।
प्रकाशित मिति: बिहीबार, फागुन २२, २०८१ १६:२६
