लमजुङको क्व्होलासोथार गाउँपालिका ६, पसगाउँमा फागुन १८ र १९ गते १५ औं पसगाउँँ महोत्सव २०८१ को आयोजना गरिने भएको छ ।
२०६० साल बैशाख १६ र १७ गते पहिलो पसगाउँ महोत्सवको आयोजना गरिएकोमा बीच सयम महोत्सव रोकिएको थियो । पछिल्लो केही वर्षयता भने निरन्तर छ ।
समुद्री सतहबाट १ हजार ६ सय ५० मिटरको उचाइमा रहेको सुन्दर गाउँ पसगाउँलाई देश विदेशमा थप चिनाउन, स्थानीय भेषभूषा, कला संस्कृति, गीत संगीतको संरक्षण र संवद्र्धन गर्न, गरिवी न्यूनीकरण गर्न, स्थानीय उत्पादनलाई प्रवद्र्धन गर्न महोत्सव आयोजना गर्न लागिएको आयोजकले जनाएको छ ।
बेंसीसहरमा बुधबार पसगाउँ सामुहिक होमस्टेले आयोजना गरेको पत्रकार भेटघाटमा क्व्होलासोथार गाउँपालिका अध्यक्ष समेत रहेका पसगाउँ सामुहिक होमस्टेका अध्यक्ष सूर्यप्रसाद गुरुङले पसगाउँ र महोत्सवबारे विस्तृत बताएका हुन् ।
दक्षिणी मोहोडामा ढुंगाले छाएका घरहरु, घुमाउने घर, गुरुङ संग्रहालय, ऐतिहासिक तथा धार्मिकस्थलहरु पसगाउँका हेर्नलायक सम्पदाहरु हुन् । गाउँका सामाजिक परम्पराहरु रोधी, हुरी, सामुहिक श्रमलगायत परम्परागत प्रथा, आमा समूहको नाच, युवा क्वलको सांस्कृतिक नाच, सेर्गा, घाँटु, कृष्ण चरित्र, सारङ्गी, झ्याउरेलगायत नाच पसगाउँमा देख्न पाइन्छ ।
वडाअध्यक्ष मनलाल गुरुङले अग्र्यानिक खानपान, परम्परागत हस्तकला, पौराणिक चालचलन, रहनसहन, प्रकृति र संस्कृतिका लागि पसगाउँ धनी रहेको दावी गरे । समय अनुकूल वनजंगलमा पाइने विभिन्न प्रकारका फलफूलले पर्यटक लोभ्याएको उनले बताए । पत्रकार भेटघाट कार्यक्रममा पसगाउँ सामुहिक होमस्टेका उपाध्यक्ष पदमबहादुर गुरुङ, सहसचिव भक्तबहादुर गुरुङ, बुद्धिजीवि ओमप्रसाद गुरुङ, गोपाल गुरुङ साथै क्व्होलासोथार गाउँपालिकाका निवर्तमान अध्यक्ष एवम् पर्यटन व्यवस्थापन समिति स्मार्ट भिलेज घलेगाउँका अध्यक्ष प्रेम घलेलगायतको उपस्थिति थियो ।
पसगाउँमा पर्यटक राख्न २१ घरमा होमस्टे तयार गरिएको छ । १ सय ६३ घरधुरी रहेको पसगाउँमा गुरुङ समुदाय लगायत भुजेल, दलित समुदायहरु पनि छन । गाउँ माथिको क्होम्रे डाँडा र ङ्योजेडाँडा पुगेपछि पोखरा आसपासका क्षेत्रमात्रै मनाङ, गोरखा, कास्कीका ग्रामीण भेगदेखि सहरहरु देख्न सकिन्छ । यहाँबाट सूर्योदय र सूअस्तमात्रै नभएर दर्जन हिमश्रृंखलाहरु लहरै देख्न सकिन्छ ।
लमजुङ सदरमुकाम बेंसीसहरबाट मालिङ, साल्मेभञ्ज्याङ, घाम्राङ हुँदै पसगाउँ पुग्न सकिन्छ । साल्मेभञ्ज्याङबाट चरागाउँ, बगैंचा हुँदै पनि पसगाउँ पुग्न सकिन्छ । बेंसीसहरबाट घलेगाउँ, भुजुङ हुँँदै पनि पसगाउँ पुग्न सकिन्छ ।
यस्तै, बेंसीसहरबाट भोर्लेटार रामबजार अथवा पोखराबाट रामबजार भएर करापु, छापा, गिलुङ हुँदै साल्मेभञ्ज्याङ निस्किएर चरागाउँ वा घाम्राङको बाटो पसगाउँ पुगिन्छ । पोखराबाट भैंसे, थुम्सीकोट, मुंग्रीवेसी, बालुवावेसी, वगैंचा हुँदै पसगाउँ पुगिन्छ । काठमाडौंबाट तनहुँको दमौली हँदै लमजुङको दुइपिप्ले, भोर्लेटार, रामबजार हुँदै गिलुङको बाटो भएर पसगाउँ पुगिन्छ ।
प्रकाशित मिति: बिहीबार, फागुन ८, २०८१ १४:३९
